Rusiya saytı 76 azərbaycanlının siyahısını yaydı

Dossier.center saytı Rusiyaya xidmət etməkdə ittiham olunan azərbaycanlıların siyahısını yayıb. Saytda yayımlanmış yazıda həm İrəvanda, həm də Bakıda Rusiyaya xidmət edən şəxslərin olduğu iddia edilir.


Yazıda qeyd edilir ki, “QRU” zabiti Valeri Çernışovun sənədləri arasında, Kremlin maraqları naminə istifadə ediləcəyi iddia edilən Azərbaycan vətəndaşlarının siyahısı olub. 76 nəfərdən ibarət olan siyahıda siyasətçilərin, ictimai xadimlərin, jurnalistlərin, politoloqların, universitet dekanlarının və perspektivli tələbələrin adları yer alıb. Bunların içində REPORT.AZ, TREND, DAY.AZ və bir çox digər yerli xəbər portalları da var. Siyahıda olan adlardan 16-sı isə xüsusi rənglə fərqləndirilib.


Məsələ ilə bağlı “Yeni Müsavat”a danışan deputat Fazil Mustafa bildirdi ki, bu cür sənədlərin müvafiq qurumlarımız tərəfindən dəqiq təhlil və yoxlanışına ehtiyac var: “Yazı üslubu inandırıcıdır, sənədlərlə zənginləşdirilməsi də ciddi qəbul olunması üçün əsas verir. Bununla belə, ayrı-ayrı şəxslərin etibarsızlaşdırılması istiqamətində addımlar ola biləcəyini də istisna etməməliyik. Bütün hallarda bu cür fəaliyyətlər qonşu dövlətlər tərəfindən həyata keçirilir və kimsəyə sirr deyil. Eyni məzmunda digər qonşu ölkələrin də təsir dairəsində olan agentura barəsində yayılması da mümkündür. Bütün hallarda hər bir dövlət öz təhlükəsizlik sistemini bu bur sürprizlərə qarşı hazır tutmağa borcludur”.






4950 просмотров