"Qızıl qələm"-in sahibi Manya Səxavətqızı

Azərbaycanın şanlı tarixinə daha bir Zəfər Günü yazıldı. Bu, Azərbaycanın qədim və tarixi şəhəri olan Şuşanın 2020-ci il 8 noyabr tarixində işğaldan azad olunması günüdür. Bununla bağlı Prezident İlham Əliyev dekabrın 3-də Sərəncam imzalayıb. Sərəncamda qeyd olunur ki, hər bir azərbaycanlı üçün əziz olan Qarabağın incisi Şuşa şəhərinin noyabrın 8-də iyirmi səkkiz illik əsarətdən qurtarılması müharibənin taleyində həlledici rol oynayıb, düşmənin siyasi-hərbi rəhbərliyinin məğlubiyyəti etiraf etməsinə və hərbi əməliyyatları dayandırmasına səbəb olub. Şuşa şəhərinin və onun işğaldan azad edilməsinin tarixi əhəmiyyəti nəzərə alınaraq, xalqımızın döyüş əzminin və qüdrətinin təntənəsinə çevrilən, dövlətimizin gələcək inkişafı və nüfuzu baxımından müstəsna əhəmiyyət kəsb edən bu misilsiz qələbə - Zəfər Günü hər il noyabrın 8-də təntənəli şəkildə qeyd edilir.

Zəfər günü ərəfəsində Azərbaycan Kütləvi İnformasiya Vasitələrin İşçilərinin Həmkarlar İttifaqının təşkilatçılığı ilə silsilə tədbirlər aparılır. Tədbirlər çərçivəsində tanınmış söz ustadları və qələm sahibləri də mükafatlandırıldı.

Belə ki, oxucu rəğbəti qazanmış şairə, publisist, ziyalı xanım Manya Səxavətqızı "Qızıl qələm" media mükafatı ilə təltif edilmişdir.

Manya Səxavətqızı 1 sentyabr 1988-ci ildə İmişli rayonunda anadan olub. "Yazılmayan sətirlər darıxır", "On üç yarpaq", "Fədailər" kitablarının müəllifi, "Vətən mücahidləri" layihəsinin həmrəhbəri, "Vətən Fədailəri" layihəsinin rəhbəri, "Vətən Fədailəri : Naxçıvan şəhidləri", "Vətən Fədailəri : İmişli şəhidləri", "ŞAHMARIN EŞQ ƏSƏRİ" kitablarının müəllifidir.
Şeirləri müntəzəm olaraq dövrü mətbuatda dərc edilir. Yaradıcılığında əsasən vətənpərvərliyin təbliğatına, şəhidlərimizin tanıdılmasına, Azərbaycanın ərazi bütövlüyünün təmin edilməsi üçün canını fəda etmiş igidlərimizin şücaəti, qəhrəmanlıq mövzusuna geniş yer verir.
Ailəlidir, 2 övladı var.

Redaksiya Manya Səxavətqızını fəxri ad alması münasibəti ilə təbrik edir, yaradıcılığında uğurlar arzu edir!