"Hər şey Vətən sevgisindən başlayır!"

"Hər şey Vətən sevgisindən başlayır!" - bu sitat tanınmış memar, iş adamı Elçin Məmmədovun facebook səhifəsində paylaşdığı statusların birində oxudum. Düşündüm ki, Elçin müəllim və rəhbərlik etdiyi "Bureau of Architects & Disegners" studiyası haqda məqalənin başlığına məhz həmin sözləri çıxardım. Ona görə ki, Vətən sevgisi Elçin müəllimin mənəvi dünyasının, yaradıcılığın və fəaliyyətinin əsas dəst xəttidir, hər bir əməli işində də müqqədəs hiss özünü büruzə verməkdədir.
Onun iki ali savadı var. Azərbaycan Memarlıq və İnşaat Universitetinin Memarlıq və İnteryer dizayn, Bakı Dövlət Universitetinin isə Hüquq fakultəsini bitirib. Bir müddət Elçin müəllim Kolumbiya əsilli tanınmış italyan memarı, Azərbaycanda bir çox layihələri işləmiş, Hembert Penarandanın dəvəti ilə İtaliyada memarlıq və dizayn sahəsində çalışıb, zəngin təcrübə qazanmışdır. Elə orda da magistraturanı bitirmişdir.
Zəhmətkeş və istedadlı gənc üçün geniş perspektivlər açılmışdır. Buna baxmayaraq O, Azərbaycana qayıtmaq, bütün var gücü və bacarığı ilə vətənə, doğma xalqına qulluq etməyi seçdi.
Kiçik məkanlı ofisdən başlayarkən, indi o paytaxtın ən görkəmli yerlərin birində, Atatürk prospektində yerləşən şahanəli salonda dizayn və interyer işlərini sərgiləndirir, adı brendə çevrilmiş "Bureau of Architects & Disegners" studiyasının rəhbəridir. Hazırda, Rəssamlıq Akademiyasında dizayn üzrə dərs deyir.
2020-ci ildə parlament seçkilərində namizədliyini irəli sürmüşdur, seçilməsədə, ruhdan düşməyib və növbəti seçkilərə qatılacağını planlaşdırıb.


Elçin Məmmədovla tanış olduqda, mən onun necə vətənpərvər, səmimi, dəqiq, nizam-intizamı dəyərləndirən, sənətinin vurğunu olduğunu müşahidə etdim. O, ölkənin nəbzi ilə yaşayan, zamanımızın ağrısını və sevincini qəlbində daşıyan insandır.
Pandemiyanın ən ağır dönəmində Elçin muəllim, İsmayıllı rayonunda ehtiyacı olan ailələrə dəstək olub, ərzaqla yardımlar edirdi.
Vətən müharibəsi dövründə Azərbaycanın ərazi bütövlüyü uğrunda vuruşan Milli Ordumuza dəstək məqsədilə Silahlı Qüvvələrə Yardım Fonduna könüllü olaraq ianələr etmişdir. O, dövlətin bütün tədbirlərinə qoşularaq, daim iş başındadır.
Əməkdaşları da sanki ona bənzər fəal, dəqiq, gayğıkeş, peşəkar insanlardır. Təsədüfi deyil ki, kollektiv müştərilərin etibarını çoxdan qazana bilib.
Şirkətin inşa etdiyi yaxud təmir etdiyi obyektlər, yaşayış evləri və inzibati məkanlar yüksək tələblərə, keyfiyyətə cavab verirlər, həm texniki-mühəndislik cəhətdən, həm də memarlıq, göz oxşayan interyer baxımından. Bəzi dizayn firmalardan fərqli olaraq, sözü gedən şirkətin kağızda yaxud elektron formatda hazırladığı layihələrdə əməkdaşlıq aparılan məhşur brendlərin istehsal etdiyi real mebel, çıl-çıraq, tekstil, aksesuar və material nümunələri əks etdirilir. Nəticədə müştərilərin gözləntiləri nəinki qarşılanır, bir çox hallarda üstələnir, çünki sifarişin həcmindən asılı olmadan, ən xırda detallara qədər diqqət yetirilir.
Hər bir uğurlu fəaliyyətin başında təşkilatçılıq və idarəçilik qabiliyyəti durur. Bununla yanaşı, barəsində danışdığımız studiya rəhbərinin böyük yaradıcılıq istedadına və potensialına malik olması həlledici rol oynayır.
Elçin  müəllim ilk növbədə məhz sənətkardır. Həyata keçirdiyi hər işi daxili dünyasının, mənəviyyatının və xəyallarının məhsuludur.




Elçin Məmmədov, qələbəmizin simvolu "Dəmir yumruq” ideyasını ilk olaraq layihələndirərək "Zəfər" abidəsi konsepsiya modelini 28 fevral 2021-ci il tarixdə təqdim etdi.
Zəfərə həsr edilmiş layihələrin davamı olraq, cənab Prezidentin 60-illik yübileyi ilə əlaqədar  Dəmir Yumruq heykəl model layihəsini isə 24.12.2021-ci il tarixdə təqdim etdi.
“Zəfər” abidəsi Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin rəhbərliyi ilə torpaqlarımızı işğaldan azad edən müzəffər Azərbaycan Ordusuna həsr olunub. «Zəfər» abidəsinin əsas simvolu Vətən müharibəsinin – "Dəmir yumruq" əməliyyatının adından götürülən Dəmir yumruqdur.
Elçin müəllimin dediyi kimi: "Zəfər abidəsi" İkinci Qarabağ müharibəsi zamanı əldə olunan qələbəmizi simvolizə etməklə yanaşı xalqımızın Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin ətrafında yumruq kimi birləşməsi, həmrəyliyi, eləcə də əsgər və zabitlərimizin sücaət və qəhramanlığını özündə təcəssüm edir".
Dəmir Yumruq heykəl modeli üzərində Azərbaycanın xəritəsi əks olunmuş, "Zəfər abidəsi” və 8 noyabr 2020" sözləri yazılıb. Səkkiz güşəli ulduzun hər tərəfində silahlı Azərbaycan əsgəri ucaldılmışdır. Dəmir yumruğun özü sadəcə əlin yumruğa bükülməsi yox, cənab Prezidentin hamımızın ürəyinə yağ kimi yayılan və dünyada məhşurlaşan bu jesti göstərdiyi kadrları öyrənilərək, eyni cizgiləri təsvir olunub. Fikir versək görəcəyik ki, bizim yumruqlarımız bir birindən fərqlənir.


Elçin muəllim abidənin layihəsi ilə elə bil müharibənin tarix kitabçasını yazıb. Qarabağın azad olunması xronikası, rəqəmləri, simvolları daşda və metalda öz əksini tapıb.
Abidənin hündürlüyü 14 metrə, diametri 11 metrə, parkın əhatə dairəsinin diametri isə 44 metrdir. Parkın əhatə dairəsinin diametri Vətən müharibəsinin davametmə müddətini ifadə edir. Dəmir Yumruq səkkiz tərəfdən əhatə olunmuş səkkiz güşəli ulduzun üzərində dayanır. Səkkiz ulduzun hər birinin üzərində əli silahlı Azərbaycan əsgərləri ucaldılmışdır. Səkkiz rəqəmi “8 noyabr” tarixini simvolizə edir.
«Zəfər» abidəsinin Bakı şəhərində Azadlıq meydanı ilə üzbəüz inşa edilməsi təklif olunmuşdur. Bu abidə tarixi kompleks olmaqla yanaşı, həmçinin park tipli istirahət guşəsi olacağını nəzərdə tutur.
Abidənin həyətində insanların gündüz və axşam saatlarında istirahətləri üçün oturacaqlar və işıqlandırma sistemi nəzərdə tutulur.




Söhbət əsnasında Elçin Məmmədovun "Qarabağ parkı" layihəsi ilə də tanış oldum.
"Qarabağ parkı" və "Zəfər abidəsi" gələcəkdə həyata keçirilə bilən ideya, model kimi təklif olunur.
"Qarabağ parkı" layihəsinin əsas mahiyyəti onun adı və milli mənəvi dəyərləri ilə bağlıdır. Parkın modeli futurizm üslubunda işlənib, hətta bir qədər fantastik filmlərdəki kosmik mənzərələri xatırlayır. Qara rəngli daşlar, böyük süni göl və ortasında Xarı bülbülü əks etdirən işıqlandırma qurğusu, suyun üstündə gəzinti üçün adalar, keçidlər quraşdırılıb, ağaclar əkilib. Bir çox digər elementlərdən istifadə edərək, müəllif qeyri-adi, gələcəyə doğru irəliləyən şəhərlərimizə yaraşan layihə təqdim edib.
Parkda "Qarabağ muzeyi"-nin inşası nəzərdə tutulur. Muzeydə Birinci və İkinci Qarabağ müharibələri haqda məlumat lövhələri, azad olunmuş torpaqların tarixləri, Azərbaycan Silahlı Qüvvələrin azad olunmuş bölgələrdə ilk dəfə sancdığı bayraqların nümayişi nəzərə alınıb.
Konsepsiyaya görə, burda kiçik və böyük nəsil ziyyərətçilərin həm maarifləndirilməsi, əhval-ruhun yüksəlməsi və istirahəti üçün gözəl şərait yaradılıb.




Ümid edirəm, Elçin müəllimin layihələrinin tezliklə mərkəzi meydanlarımızın birində reallaşmasını görəcəyik.
Ümumilli lider Heydər Əliyevin ad günü ərəfəsində  Elçin Məmmədov memarlıq və dizayn sahəsinin inkişafına verdiyi töhfəyə, dövlət siyasətinə, rəmzlərinə sadiqliq, sədaqətlik göstərməsi və geniş təbliğ etməsinə görə Azərbaycan Kütləvi İnformasiya Vasitələri İşçilərinin Həmkarlar İttifaqı tərəfindən "Azərbaycan bayrağı" fəxri media diplomuna layiq görülüb.
Laureatı təbrik edirik!

Hazırladı Gülçin